Гэмгэгивикин ангыт яӈвоӈ 27 чиӄъивив йиг’илгык. Яӈъя валг’ын этгиӈын в’утин ячвыӈчатгиӈэн китыӈ, мыев’ г’ытг’ылг’а накогалаӈвоӈын чымӄып йиг’этэн явытгыйиӈӄо Елизовык. Эв’лыгиӈын в’инин- 10 км. Ымоӈ ею еллайкэ ванык «Долина уюта».

«Эчги ымоӈ ею накончоччымав’ӈынав’ тит, нымэлг’эв’ нагалан ангыт. Нэкугитэӈнэв’ вэтгиӈо вэтатылг’эн ЖКХ, миӈкые явэталайке лэйвинэӈу, миӈки янвэлвйкэ ымыӈ машинав’, то тит ав’ийитг’ыматка ныг’итикынэв’ ангытыткома, то миӈкые опта явэталайке инэнвилиткувылг’у, в’иннетылг’у»,- панэнатвэ инэллэчг’ын Елизовский муниципальный районык С. Тюлькин.

Спортакенак ячвыӈчатгиӈык еллаӈ тыгылг’атгиӈо тагийниӈылг’ин, снегохода то мотоциклата , ячав’атытколаӈ, айгытӄываяткечг’энаӈ яйиньниӈлаӈ, япеӈкотколаӈ уетикэпыӈ.

«Ячвыӈчатгиӈык опта еллаӈ: уетик-спринт то тигу-спринт. То яячвыӈлаӈ уемтэв’илг’у то эльг’ав’, уетик- спринт 15 км, тигу-спринт 3 км», - эв’лай оргкомитетык.

Ямкичилг’ыйикыӈ то в’алэлӈатылг’ыйикыӈ накончоччымав’ӈынав’ кымиӈычгин уйичвэтваны, энангыеватгиӈо митг’алӄылин, меӈию чинин гэтэйкылинэв’. Виткуг’ат нэенгыйивэнӈын фотовыставкан «Лыг’улӄылу Елизовский спринтакен».

В’утку нэенг’уевэнӈынэв’ гамгаваятэн кимитг’ав’ то в’аӈэниӈо налгин. Ангытванык явэталайке палаткав’ миӈки чаёма ёмав’лайке.

Йинчоччымав’нэн С. Тынанто.