Энангыеватгиӈын «Лымӈылькен Камчаткан: гийникналгу то ныйийкыӄинэв’ налгу», меӈин нэнв’эӈэтын 1 тэнмыталойиг’илгык Петропавловскак- Камчаткакен кув’иннетыӈ йингычголавык чининваяткэнав’ вэтгиӈо то   опта коплэпав’ӈыволаӈ иччету, меӈиныйик накотайкыӈвоӈнав’ имы ею айгытӄываяткечг’энаӈ нотаг’эӈыткынык.

Энангыеватгиӈык «Нучельӄын Камчаткакен», меӈин ӈынвычая накоёг’ыӈвоӈын, келлаӈ митычг’у гамгарайоныӈӄо. В’утку котвалаӈ тайгийниӈ иччету, меӈию котагейнэӈӈыволаӈ то амъел котаналгыӈӈыволаӈ.
«Мую ӄонпыӈ мыткенӈыволаӈ энангыеватгиӈык. Ынниг’ан валг’о этгиӈо ков’эннянӈыволаӈ яйтаӈык айгытӄываятэн вэтгиӈо. В’ото, митычг’у В’анав’ӈайиӈӄо ӈынвыӄ ковэталаӈ йинмитытватык кымиӈу тэйкык митг’алӄылу айгытӄываяткечг’энаӈ. Инмы мыкыӈ мынг’ыетикынэв’ вэтгиӈо амалваӈ валг’эн митычг’ин»,-эвыӈ етытылг’ын Быстринский районыӈӄо С. Комарова.

Энангыеватгиӈык уйӈэ ятан гийникналгу атвака, в’утку ымыӈ ӄуччев’ вэтгиӈо келлаӈ- манигытг’улин, стеклокенав’, имыяӄ пылв’ынтыӈӄо. Опта выставкак кенӈыволаӈ чинин вэтатылг’о иччету, ычгынан нэкунгыйивэнӈынэв’ чининкинэв’ вэтгиӈо ванык «Нучельӄын Камчаткакен», в’отэныӈӄо наконгычголав’ӈынав’ чининкинэв’ вэтгиӈо.

«Опта мыткенӈыволаӈ выставкак, мыткунгыйивэнӈынэв’ койӈо то кимитг’ав’. Пылиткома энангыеватгиӈо комканӈыволаӈ йивиту. Эчги мыткотайкыӈвоӈнав’ имы миӈкые валг’о футболкав’. В’утку мытлыг’овылӈылаӈ омакаӈ ӄутин митычг’ыйик то эчги омакаӈ мытковэталлаӈ»,- панэнатвэ инэллэчг’ын иччетин «Абориген Камчаткакен» А. Шеметов.

Митычг’ын вэтатык стеклотэминӈылг’ын Петропавловск- Камчаткакен С. Самохин эвыӈ, энангыеватгиӈын кув’иннетыӈ лыг’ук нытуйӄинэв’ чаткаёӈгиӈо амъел нэӈиньмыэв’ вэтатык.

Эчгыпо йинчоччымав’нэн С. Тынанто.