В’уччин этгиӈын итти ӄоньг’айичыӈкэн г’ылв’ыёв’. В’утин гивик ынно галай Олюторский районык. Ӈакые нанӈивынав’ лиги лыӈылг’у Камчаткак- Л. Кручинина ( итылг’ын йинойпакмевылг’о Инэллэиччетин РФ «Ӄалалв’ын Россиякен», инэллэчг’ын митычг’ин «Уйирит»), Л. Банаканова (митычг’ын вэтатылг’ын культурак, йинойпакмевылг’ын Инэллэиччетэ РФ «Ӄалалв’ын Россиякен»), Н. Инданова ( инэллэчг’ын «Мэнэдэк»), А. Адуканов(тэминӈычг’ын г’ытг’ымыӈӄо), то вэтатылг’ыт КЦНТ М. Беляева то В. Гуменюк.

«Нэнв’эӈэтын в’уччин фестиваль ЦК то Д в’уйвык Тэличчан. В’утку итти энанг’ояватгиӈын чининваяткэнакьет тамэнӈыниӈэн айгытӄываятэн. Чининкинэв’ вэтгиӈо нэнгыйивэнэв’ митычг’а Карагинский, Тигильский, Мильковский, Елизовский, Олюторский районыӈӄо то Петропавловскаӈӄо- Камчаткакен.

В’алэлӈатылг’а нэлэг’унэв’  имы ею ынныӄулгин, митг’алӄылу ӄояйиннэн, чеючгу выг’аен, элючу йинкеметг’айпылг’о айгытӄываяткечг’энаӈ то ӄуччев’ ӈынвыӄ ею. Галама энангыеватгиӈын эллай амалваӈ валг’о энанметытватгиӈо. Кымиӈу то ынпычг’у нанмитытваннав’ ӄоячмкычг’энаӈ тэчеючгыӈкы, эллай энанметытватгиӈо мылавык»,- эначгыпав’лай краевой инэллэиччетык культурак. Вэтанма фестиваль вэтатылг’о КЦНТ йитг’атвылӈылай ыныпываятык юнэтылг’у Олюторский районык, накалинав’ ычгинэв’ энакетог’атгиӈо. Наёг’ын чав’чываангыт «Килв’эй». В’утку чененкэчг’энаӈ кокайвылай, опта наёг’ын яйичгыангыт «Г’иелг’у» , мыев’ гайтолэн лёвыльг’ын.

Яноткен энангыеватгиӈын «Митычг’у нучельӄин Уйкоаль» галай 2013 гэвэгиӈык ӄояямкыванык «Мэнэдэк» В’анав’ӈайгэӈкы. Эчги ыннин фестиваль лиги нэкулӈыӈын.

Яноткенав’ чаткаёӈгиӈо фестивален келлаӈ- тит метгиӈо имы еӄык айгытӄываяткечг’энаӈ лиги нэнг’ылӈикынэв’ туйчыг’э то намитытвийкынав’ ыннинг’ан вэтатык.

В’уткекьйит панэнатвылай эначгыпавылг’о инэллэчг’ин то Инэллэиччетин Камчатский край.

Эняннимэв’нэн С. Тынанто.